Komisariotzako ikasleek hiru ziklo programatu dituzte Courtisanen

Courtisane Festival jaialdiak Elías Querejeta Zine Eskolaren 2022-2023 promozioko Komisariotzako ikasleek antolatutako hiru film-programa aurkezten ditu. Belgikako jaialdiaren eta eskolaren arteko erakunde arteko lankidetza hori Courtisanek berak egindako proposamen baten ondorioz sortu zen. Proposamen horrek, beste ekimen batzuen artean, instituzioaren diskurtso propioari begirada berriak ekartzea proiektatzen du, zinema-komisariotzaren lanari buruz hausnartzeko barne-prozesu baten ondorioz.

Sara Domínguez López-ek (Madril, 1999) "There Is Nothing To Celebrate, My House Is Empty" (Ez dago ezer ospatzeko, nire etxea hutsik dago) programa antolatu du. Programa horrek Mexiko eta Peru bezalako bi nazioen historia konplexuaren iragatean parte hartzera gonbidatu nahi ditu ikusleak, Los Ingrávidos kolektiboaren eta Colectivo Silencio kolektiboaren obraren bitartez.

"Shameless Memories from Latin America" (Latinoamerikako memoria lotsagabeak) Alejo Duclósek (Buenos Aires, 1998) komisariatutako cuir/queer programa bikoitzaren izenburua da. Programaren lehen zatian, Kolonbiatik eta Mexikotik etorritako zinemagile garaikide talde baten lana biltzen da, beren lurraldeko antzinakotasunarekin eta mitologiarekin duten lotura esploratzeko. Bigarrena, 80ko hamarkadako film labur brasildar batzuek osatzen dute.

Azkenik, "What Is Irony, If Not Melancholy?" (Zer da ironia, malenkonia ez bada?), Mireia Montanék (Bartzelona, 1998) egituratu duen programa, hizkuntza zinematografikoaren esparruan ironiak jokatzen duen paperari buruzkoa da. Programa Daniela Delgado Viteri eta Jorge Jácomeren lanetan oinarritzen da, leku bateko kide izateko beharraz eta nostalgiarekin bizitzeaz hausnartzeko. 

Courtisane Festival jaialdiaren 23. edizioa Ganten (Belgika) ospatuko da martxoaren 27tik 31ra.