Arkitektura ikasketak egin zituen, baina zinemagile izatea du bokazio. Arkitektura bere pasioetako bat den arren, arte bisualak beti izan ditu gogoko eta, horregatik, arkitekturako ikasketak bukatu eta hiru kontinentetan bizi izan ostean –Monterrey, Lisboa edo Shanghai hirietan–, etxera itzultzeko garaia iritsi zela erabaki zuen, bere pasio nagusia garatzera: zinema. LACØRTE films enpresaren buru da 2016. urteaz geroztik, eta honako lan hauek zuzendu ditu: “Athanatos (2018)” dokumentala Tenerifeko Kabildoarentzat, edo “El nuevo vecino (2018)” fikziozko film laburra; azken horretan Itziar Aizpuru da protagonista, eta Donostiako film laburren jaialdian Etxean Shortuak saria irabazi zuen. Errealizatzaile gisa egindako azken lanen artean dago “Ojo por ojo (2019)” film laburra; Amaia Lizarralde da protagonista eta nazioarteko hainbat jaialditarako hautatu dute.
Profil honen azken eguneratzea: 2020
