Berriak /
EQZEk Radical Film Network Madrid 2024 konferentzian parte hartuko du
Elías Querejeta Zine Eskolako ikasketen eta ikerketa-jardueraren esparruan garatutako proiektu askok parte hartuko dute Radical Film Network konferentziaren aurtengo edizioan, ekainaren 19tik 22ra bitarte, Madrilen. Aurtengo topaketan mundu osoko unibertsitate, ikerketa-zentro, kolektibo eta elkarteetako ordezkariek eta ikertzaile independenteek parte hartzea aurreikusi da, helburu izanik mugimendu politikoetatik, oinarrizko erakundeetatik, artisten kooperatibetatik eta espazio alternatiboetatik heldu diren artxiboei buruz hausnartzeko moduak arakatzea.
Ostegunean, hilak 20, Matias Fajn eta Laura Alhach-ek memoriaren eta militantziaren gaineko hausnarketa proposatuko dute bi ponentziaren bitartez: "Lucha Film Collective a través de la película Comunicado de Argentina: cine, memoria y militancia en los años 70” eta “Yuruparí’ (in)visible: ejercicios de memoria política, colectiva, material y encarnada”. Egun horretan bertan, EQZEko ikasle izandako Laura Corteganak Sevillako mugimendu feministaren artxiboari buruzko solasaldi batean parte hartuko du Azahara Lozano eta Violeta Sarmientorekin (La digitalizadora de la memoria colectiva sareko kideak) batera.
Donostia Zinemaldiak eta EQZEk Zinemaldiaren artxiboan egindako lanaren ondoren, artxiboa bera eta artxiboaren kontserbazio-egoera, ikerketa-lanak eta irisgarritasuna aztertuko dituzte Minerva Camposek (Gaztela Mantxako Unibertsitatea), Aida Vallejok (UPV/EHU) eta Violeta Kovacsis-ek (Pompeu Fabra Unibertsitatea), "Activación de archivos con proyectos financiados: tres experiencias en primera persona del archivo del Festival de San Sebastián" hitzaldian. Hirurek SSIFFek eta EQZEk Zinemaldiaren artxibo dokumentala ikertzeko beka jaso zuten.
Hilaren 21ean, ostirala, ikerketa-sailaren bitartez EQZE egiten ari den lanak hartuko du protagonismo berezia, eskolak sustatutako proiektuei buruzko hitzaldi batean. Ekimen horietako hiru izango dira mintzagai nagusi: "C3. Lerrokatu gabeko zinema-artxiboak", "Bigarren eskukoa. Berrerabilera eta desbideratzeak zinemagintza iberoamerikarrean" eta "Zinebi Gordailua. Bilboko Dokumentalen eta Film Laburren Nazioarteko Jaialdiaren funts zinematografikoari buruzko ikerketa", Carolina Cappa, Léa Morin, Santiago Aguilar –ikertzaile nagusiak– eta Pablo La Parra Pérez EQZEko Ikerketa Saileko koordinatzailearen parte-hartzearekin.
Bestalde, Veronica Boggiok eta Julio Gonzálezek Peruko lurraldeetara eramango dute konferentzia, ponentzia hauekin: “Otras miradas amazónicas: archivos misioneros de la amazonía peruana” eta “Derivas videográficas hacia la imagen/archivo de la Comunidad Autogestionaria para el Desarrollo Integral del Alto Pushka”. María Barea zinemagilea ere Perukoa da, eta bere lana kontserbatzeko egiten ari den lanari buruz eztabaidatuko du Kauri Ximon Jaureguirekin batera. Jauregik Bareak 1993an zuzendutako Antuca pelikularen zaharberritzean parte hartu zuen eskolako beste ikaskide batzuekin batera. Elkarrizketa honen izenburua: “El proceso de preservación de las películas del Grupo Warmi en Perú y Euskadi".
Azkenik, “Los subterráneos: el archivo del cine amateur cubano” hitzaldiarekin, Archivistas salvajes kolektibotik Kubako zinema amateurraren lehen artxiboa sortzeko egiten ari diren lana aurkeztuko dute Lucia Malandrok eta Daniel Saucedok.
Radical Film Network (RFN) 2013an sortu zen Erresuma Batuko zinema-kultura erradikalekin lotutako aktibista, akademiko, zinemagile eta programatzaile talde baten eskutik, lankidetza-sare zabalago bat eratzeko helburuarekin. Harrezkero, RFN hazi egin da, eta orain mundu osoko berrogei herrialdetako berrehun erakunde baino gehiago biltzen ditu: artisten estudioekin eta ekoizpen-kolektiboekin hasi, eta artxibo independenteekin, kooperatibekin, banatzaileekin, zinema-jaialdiekin eta zinema-aretoekin bukatu.