Mikele Landa eta Marieke Elzerman aukeratu dituzte Ikusmira Berriak programaren edizio berrian parte hartzeko

Maria Elorza, Marieke Elzerman, Felipe Gálvez, Lucy Kerr, Mikele Landa eta Cande Lázaro egileen proiektu zinematografikoak hautatu dituzte 2024ko Ikusmira Berriak programaren hamargarren edizioan inskribatutako 362 proiektuen artetik. Donostia Zinemaldiak, Tabakalera-Kultura Garaikidearen Nazioarteko Zentroak eta Elías Querejeta Zine Eskolak (EQZE) antolatzen duten ikus entzunezko proiektuen egoitza eta garapen programan izena eman duten guztien artean, EQZE eskolako ikasleak dira hamahiru, hemezortzi Nest ataleko parte hartzaileak, EAEko zinemagileak dira 27, 100 Espainiakoak eta 204 dira nazioarteko kategoriakoak.

Maria Elorza, Felipe Gálvez eta Lucy Kerr egileek haiek bigarren film luzea egingo dute, bakoitzak bere lanekin Cannes, Locarno eta Donostiako zinema-jaialdietan debutatu eta arrakasta izan ondoren; Marieke Elzermanek, Mikele Landak eta Cande Lázarok, berriz, haien lehen film luzeak landuko dituzte, film laburren arloan ibilbide oparoa egin ondoren. Hauexek dira Tabakalera, EQZE eta Donostia Zinemaldiko ordezkariz osatutako Ikusmira Berriak programako hautespen batzordeak aukeratutako sei tituluak:

EQZE KATEGORIA: Wash Over, Marieke Elzerman (Herbehereak).

NEST KATEGORIA: The Bow, Lucy Kerr (AEB).

EUSKAL KATEGORIA: Caro Bastiano, Maria Elorza (Gasteiz, Espainia).

EUSKAL KATEGORIA: Senda, Mikele Landa (Bilbo, Espainia).

ESPAINIA KATEGORIA: La Pastora, Cande Lázaro (Badajoz, Espainia).

NAZIOARTEKO KATEGORIA: Impunidad, Felipe Gálvez (Txile).

Ikusmira Berriak programaren historian lehen aldiz, Euskal Autonomia Erkidegoko bi proiektu hautatu dira. Mikele Landa (Bilbo, 1995), berriz, EQZE eskolako ikasle ohia da eta zuzendari onenaren saria jaso zuen Euskal Zine Bilera zinema-jaialdian Heldu bere lehen film laburrarekin. Nest atalerako hautatu zuten 2022an Noizko basoa film laburrarekin eta Zinebi eta Punto de Vista zinema-jaialdietan ere hartu zuen parte. Egoitzan garatuko duen Senda proiektua, bere lehendabiziko film luzea izango dena, Noka Mentoring eta Elkarrekin Sortzen programetatik ere igaro da. Bestetik, Maria Elorza (Gasteiz, 1988) Ancora Lucciole (2018) eta Quebrantos (2020) saritutako film laburren egileak Donostia Zinemaldiko New Directors sailean aurkeztu zuen bere film luzeen munduko bere debuta, A las mujeres y a los libros canto filmarekin, eta Gazteen TCM Saria jaso zuen, Euskal Zinemaren Irizar Sariaren aipamen berezia; eta hori zinema-jaialdietan zeharreko ibilbidearen hasiera besterik ez zen izan, orain dela gutxi primeran amaitu zena, Porto Doc zinema-jaialdian eskuratutako sariarekin.

Elia Querejeta Zine Eskolaren kategorian eskola horretako ikasleek eta ikasle ohiek dute parte hartzeko aukera eta Wash Over hautatu dute, Marieke Elzerman nederlandar zinemagilearen lehenengo film luzea. Rotterdameko zinema-jaialdian aurkeztu zuen iaz bere lehenengo lana, La voz rosa.

Nest kategorian, berriz, Zinemaldiaren zinema-ikasleen film laburren lehiaketaren azkeneko bost edizioetan (2018-2022) hautatutako zinemagileek har dezakete parte, eta Lucy Kerr estatubatuarraren (Houston, Texas, 1990) The Bow filmaren aldeko apustua egin dute aurtengo edizioan. Crashing Waves film laburrarekin hartu zuen parte Nest atalean, eta Family Portrait bere lehenengo film luzeak zuzendari onenaren Boccalino d’Oro saria jaso du Locarnoko zinema-jaialdian, baita beste hainbat sari ere. Espainiako lanen kategorian, bestalde, Cande Lázaro (Badajoz, 1997) artista bisual eta zinemagilearen proiektua hautatu dute; hainbat zinema-jaialditan saritu dute Mar(i)cona bere film laburra. La Pastora filman. Florenci Pla pertsonaia berreskuratzen du, Maestrazgomendilerroko maki intersexual bat, eta generoaren konplexutasunari buruz hitz egiteko espazio bat ezartzen du. Felipe Gálvez (Txileko Santiago), berriz, Cannesko zinema-jaialdiaren azkeneko edizioan hautatu zuten Un Certain Regard atalean, Los colonos bere lehenengo lanarekin, eta Fipresci Saria jaso zuen; gainera, Horizontes Latinos atalean hartu zuen parte eta Oscar sarietako ingelesezkoa ez den filmik onenaren sarirako izendatzeko hautatu du Txilek.

Zortzi astekoa izango da egoitza, bi egonalditan banatuta. Martxoaren 4an iritsiko dira zinemagileak Tabakalerara, eta apirilaren 14ra arte izango dute haien proiektuak garatzen lan egiteko aukera, Artisten Espazioan. Denbora horretan, proiektu bakoitzerako haien beharren arabera propio hautatutako aditu eta profesionalen batzordeko kideen aholkularitza izango dute. Ekainean, bi egonaldien artean proiektua garatzen jarraitzeko laguntza bat jasoko du egoiliar bakoitzak. Irailean, Zinemaldia ospatzen den egunetan, Donostiara itzuliko dira, egonaldiaren azkeneko bi asteak osatzeko.