Mexiko Hiria, 1989. Andrés Martínez de la Viña zinegile emergente bat da, eta Zinemagintza ikasi zuen Goi Mailako Zine Eskolan.
Mezcal Epaimahaiko kide izan zen Guadalajarako 34. Zinemaldian. 2019an, FIAF eta UNAMek (Mexikoko Unibertsitate Autonomo Nazionala) Mexikon antolatutako Babes eta Zaharberritze Zinematografikoko Eskolan parte hartu zuen. UNAMeko Filmotekan egin zituen gizarte-zerbitzuak, eta bekadun gisa aritu zen ondoren. Bertan, El film sobre arte en México dokumentala ekoizteko enkargua jaso zuen, eta, horri esker, filmen zaharberritzearen lan-fluxuari buruz ikasteko eta horretan laguntzeko aukera izan zuen. Proiektu hori 16 eta 35mm-an filmatutako 9 film labur zaharberritzean zetzan, 1960 eta 1975 urteen artean UNAMeko Ikasketa Zinematografikoen Unibertsitate Zentroan ikasle izandako zinemagileek ekoitziak. Filmek Mexikoko hainbat artista plastiko nagusiren sorkuntza-prozesua irudikatzen dute, besteak beste, Frida Kahlo, David Alfaro Siqueiros eta Rufino Tamayorena. 2022an, FIAF, ACE, Cineteca di Bologna eta L’Immagine Ritrovata-k Bolognan antolatutako Filmen Zaharberritze Eskolaren 9. edizioan parte hartzeko hautatu zuten.
Ikus-entzunezkoen zuzendari gisa, zenbait postutan aritu da lanean, hala nola editore, argazkilari eta ekoizle gisa. Gainera, soinu-teknikari gisa aritu da hogei film laburretan baino gehiagotan eta dokumental luze batean. 2023an, Castello Erranteko Zinema Egonaldian soinuaren sailean aritzeko hautatu zuten. Occhi di Giove-k antolatu zuen egonaldia, Italiako Kultura Ministerioaren eta Ibermediaren laguntzarekin.
Zinemagintza esperimentaleko ikastaro batzuetan parte hartu du, eta zinema-kamera analogikoak erabili izan ditu. Gainera, "La Vena" zinema-laborategi independentean aritu zen lanean, Fomapan film-materiala inportatu eta errebelatzen.
Gaur egun, CAMERA OBSCURA proiektu akademikoaren postprodukzioaren amaierako prozesuan dago murgilduta. Film labur esperimental horrek zalantzan jartzen du dokumentalen eta fikziozko lanen arteko muga, hainbat formatutan jasotako irudien nahasketa eta found footage-a esploratuz. Hala, sorkuntza-prozesuaren eta haren ahalmenaren inguruan hausnartu nahi du, zinemagintzak merkataritza-produktu gisa duen hegemoniarekin eta irudi garaikidearen saturazioarekin lotuta.
Profil honen azken eguneratzea: 2024
