Zinemagileak
egoitzan
Elkartruke praktiko eta teorikorako gune bat
2021-2022 Ikasturtetik aurrera, Elías Querejeta Zine Eskolak ospe handiko zinemagileak gonbidatzen ditu EQZEren komunitatean denbora jakin batez bizikide izatera, bere lan prozesua partekatzeko eta praktika eta esperimentazio zinematografikoko proiektu bat sortzeko ikasleekin. Egonaldi horien iraupena aldatu egiten da proiektuen eta ikasturteko fasearen arabera.
Egonaldiko zinemagilearen kategoria EQZEren egonaldi akademiko eta ikertzaileen planaren barruan dago, eta helburu du sorkuntza zinematografiko garaikideari laguntzea eta pertsonen arteko edo taldeko transmisio modu bati mesede egitea.
Egonaldian, egoiliarrek proiektu zinematografiko berria garatzen dute, eskolaren baliabideen laguntzarekin. Paraleloki, zinemagile egoiliarrek sorkuntza prozesua irekitzen dute Sorkuntzako ikasleekin, lan egitasmo zehatz baten bitartez.
Programaren nahia da proiektu jakin batean murgilduta dauden aukeratutako egonaldiko zinemagileen sorkuntzaren babesa eta espazio baten sorrera uztartzea, espazio hori elkarrekiko ikaskuntzarako, belaunaldien arteko transmisiorako eta ikasleek eta egonaldiko zinemagileak elkarrekin bilaketa zinematografikoa egiteko espazioa izanik.
Radu Jude
2021-2022 IKASTURTEA
Radu Jude (Bucarest, 1977) zinemagileak Sorkuntza taldeko ikasleekin partekatu zuen unean filmatzen ari zen film berriaren aurrerapena (gidoia, castingetako irudiak, kokalekuak, kamera-probak…). Bestalde, mintegi bat antolatuko zuen zinemak aurrean dituen ataken inguruan, memoria historikoarekin zerikusia duten gaiak jorratzen dituenean, Îmi este indiferent dacă în istorie vom intra ca barbari (I Do Not Care If We Go Down in History as Barbarians, Radu Jude, 2018) filmaren eta obra hori osatzen duten materialetako batzuen (argazkiak, artxiboko irudiak eta testuak…) azterketa kritikoa oinarri hartuta.
Zinemagilearen proposamena osatzeko proiektu zinematografiko bat garatu zen, Thomas Bernharden testuen moldaketetan oinarritutako pieza laburrez osatua, ikasleen inplikazioarekin sormen prozesu osoan. Marius Panduru argazki zuzendariarekin batera lan egin zuen Radu Judek egonaldiaren fase batean.
Pedro Costa
2022-2023 IKASTURTEA
Pedro Costa-k (Lisboa, 1959) sorkuntza zinematografikoari buruz duen ikuspegia eta lanean, konstantzian eta zorroztasunean oinarritutako metodoa partekatu zituen Sorkuntzako taldeko ikasleekin. Film bat osatzen duten materialak aztertzeko eta ekoizteko bitartekoei buruz duen kezka eta errealitatea irudikatzeko konpromiso sendoa ere landu ziren lan saioetan. Hauetan, bere filmografia aztertu zen bere osotasunean.
Rita Azevedo Gomes
2023-2024 IKASTURTEA
Rita Azevedo Gomes-ek (Lisboa, 1952) honako hau proposatuko zien Sorkuntzako ikasleei bere egonaldian: A Céu Aberto (Zeru zabalean) proiektu zinematografikoaren garapenean elkarrekin parte hartzea; zinemagile portugaldarra Regina Guimarães poeta, antzerkigile eta gidoilariarekin batera ari da proiektu horretan lanean.
Dennis Lim
2023-2024 IKASTURTEA
Dennis Lim-ek(Malaysia, 1973) EQZE eskolako Komisariotza taldeko ikasleei emango dien irakasgaian ibilbide bat egingo du XIX. mendetik hasi eta XXI. mendera bitarte, kuradoretza artistikoari eta zinematografikoari buruzko pentsamenduan barrena. Irakasgaian, kultur bitartekaritzako eta programazioko jardunbideei buruzko alderdi teorikoak landuko ditu eta, aldi berean, kuradoretza artistikoaren eta filmikoaren arteko loturak eta kontrasteak planteatuko ditu, hainbat ikerketa kasuren bitartez. Irakasgai honen osagarri, hamar filmeko programa bat prestatu dugu, Lim-ek egonaldian landuko duen saiakeraren gai nagusian oinarrituta, eta zinemaren historiarekin eta orainarekin dauka zerikusia, kulturaren eta teknologiaren arloetako krisialdien eta balizko ‘heriotzen’ bitartez adierazita. The Deaths of Cinema (Zinemaren heriotzak) lanarekin gai horretan sakondu nahi du Tsai Ming-liang, Wim Wenders, David Cronenberg, Kathryn Bigelow, Bill Morrison, Kiyoshi Kurosawa eta David Lynch zinemagileen obraren bitartez.
