Pieza zinetikoak eta abangoardia eskopikoak

Ikerketa-proiektu honek Gipuzkoako Foru Aldundiaren Bidegileak ikus-entzunezko ondare bilduma du aztergai. Bildumako objektuen artean, alde batetik, zinematografoaren asmakuntzaren aurreko irudi-bandak, irudi-diskoak, Kinora-biribilkiak, bista zeharrargiak eta linterna magiko-plakak daude. Bestetik, formatu eta kolore-sistema ezberdinetako filme primitiboak ere badira. Aipatutako objektu zinetikoez gain, bildumak 3D goiztiarreko bista estereoskopikoak eta anaglifoak, eta baita kaleidoskopio eta kromatoskopio bidezko abstrakzio geometrikoak ere agertzen ditu, besteren artean.

Bidegileak bilduma Gordailuan, Gipuzkoako Ondare Bildumen Zentroan, Photomuseum Argazki eta Zinema Museoan eta Euskadiko Filmategian kontserbatzen da. Bildumaren balio historiko eta estetikoa bere piezen aitzindaritasunetan datza, eta forma bisual eta zinematografikoen garapenean egindako ekarpen zientifiko eta artistikoan.